Alboko erdarek joera nabarmena dute adierazpide arruntean eman daitekeen esaldi bat (juntaduraz zein alborakuntzaz emanik, alegia) perpaus menderatuaren forman emateko (subordinaziora jotzeko, alegia). Prozedura horri jarraikiz, desbideratze estilistikoz, kalko desegokiak sortzen dira maiz euskaraz, berezko edo oinarrizko adiera aldaraziz esaldiari. Horixe gertatzen da, esaterako, molde honetako esaldiekin:

• gerundio narratiboarekin: *Kolpe bat eman zion, hilda utziZ (> Kolpe bat eman zion, eta hil. (→ gerundioa (erdal))

• bitartean denborazko adberbioarekin: ?Langileen erdiak euskaldunak diren bitartean, beste erdiak, erdaldunak (> Langileen erdiak euskaldunak dira, eta beste erdiak, erdaldunak). (→ bitartean)

• kausa/denbora ez bereiztearekin (→ ondoren ≠ bait-)

• erdarazko (es) cuando / (fr) quand preposizioak eragindako denborazko ustela (→ -(e)nean menderagailua eta kalkoak): #Zerbait jakingo du, halako ziurtasunez mintzatu denean (> Zerbait jakingo du: (izan ere,) halako ziurtasunez mintzatu da / Zerbait jakingo du: halako ziurtasunez mintzatu da (eta) / Zerbait jakingo du, (zeren) halako ziurtasunez mintzatu baita / Zerbait jakingo du, halako ziurtasunez mintzatu da / Zerbait jakingo du, halako ziurtasunez mintzatu bada / (...)).
• edo molde honetako esaldiekin, besteak beste:

*Bilboko biztanleriak behera egin badu, Gasteizkoak gora (> Bilboko biztanleriak behera egin du, eta Gasteizkoak, berriz, gora).

*Tropeletik ihes egin zuen helmugatik bi kilometrora harrapatua izateko (> Tropeletik ihes egin zuen, eta helmugatik bi kilometrora harrapatu zuten).

*Sopuertan 1.200 lagun argindar barik geratu dira bart, hornidura eguerdirako berrezarri badute ere (> Sopuertan 1.200 lagun argindar barik geratu dira bart; eguerdirako berrezarri dute hornidura).