Bai, zuzena da iritziz aldatu NAIZ egitura.

Gehienetan, -z aldatu egitura lekua, egoera eta arroparekin erabili izan da: etxez aldatu naiz, lekuz aldatu zara, ostatuz aldatu zen; bizitzaz aldatu zen, mailaz aldatu gara, iritziz aldatu naiz; soinekoz aldatu zen, arropaz aldatu da...

Kasu horietako batzuetan, aldatu aditza du moduan erabilita ere adieraz daiteke gauza bera: soinekoa aldatu dut, arropa(k) aldatu d(it)ut… Beste batzuetan, aldatu du esaldiek beste esanahi bat dute: ‘etxea aldatu du’ esanda, etxean moldaketak egin direla adierazten da.

Iritziaren kasuan, baliokideak dira iritziz aldatu naiz eta iritzia aldatu dut. Euskaltzaindiaren Hiztegian adibide hauek ditugu: Ez bainaiz gehiegi gai honetan iritziz aldatu ([EH:aldatu] sarreran); Nolanahi ere, ez dut iritzia aldatu ([EH:iritzi] sarreran).

Horrez gainera, ikus hau ere: "Aditzaren jokabidea: aldatu (da/du)" (JAGONET).