Bai, bi esaldi horiek zuzenak dira. Erreferentzia Euskal Gramatika. Lehen Urratsak I, 235. or. liburukian dago. Han esaten da ezen, hizkuntzarako, zaila dela zehaztea bizidunen eta bizigabeen arteko muga zehatza non dagoen; nolanahi ere, -ga- artizkia duten formak bizidunekin erabiltzen direla nagusiki, baina horrek ez duela esan nahi -ga- gabeko formak bizidunekin erabil ezin daitezkeenik; ez eta -gadun formak bizigabeekin erabil ez daitezkeenik (Zure ontasun eta pazientzia handiagana, Kardaberaz).

Esaten da, era berean, ezin sar daitezkeela euskalki guztiak zaku berean: mendebaldean, dirudienez, ekialdean baino gehiago erabiltzen da -ga- artizkia; eta ekialdeko euskalkietan nitan (‘ni(re)gan’), nitarako (‘ni(re)ganako’) eta gisako formak arruntak dira.

Bizidunen erabileran, pertsonaren nortasuna edo banakotasuna adierazten da bizidunen formaren bitartez (gizonengan); besteak, berriz, taldea adierazten du gehiago (gizonetan). Taldea adierazten da, adibidez, lagunetara noa esatean; eta zuzentzat hartu behar da hori ere.