Bai. Izan ere, ezagutu aditza ez da horrela erabili tradizio zahar eta berrian.

Azken orduko kalko baztergarria izateko itxura osoa dauka, seguru asko erdarazko conocer/connaître aditzaren balio guztiak, automatikoki, euskal hitzari ere eransteagatik sortutakoa. Gogoan izan euskaraz ezagutu aditzak erdarazko conocer=(re)conocer / connaître=(re)connaître aditzekin dauzkala kidetasun semantikoak, eta ez conocer=saber/savoirekin. Hori dela eta, euskaraz hizkuntzak jakin egiten ditugu, eta ez ezagutu; datuak jakin, eta ez ezagutu; matematikako erregela bat jakin, eta ez ezagutu. Horregatik, itzulpen kaxkarra da, esaterako, erdarazko conocimiento de lenguas / connaissance de langues euskaraz hizkuntzen ezaguera moduan itzultzea (hobe hizkuntzen jakite-maila, adibidez), ez baita esaten zenbat hizkuntza ezagutzen dituzu?, baizik zenbat hizkuntza dakizkizu?

Beraz, hobe da, dudazko gainerako kasuetan bezala, zalantzarik gabeko formetara jotzea, hots, ohikoagoetara.