Ez dago araututa, ez. Euskaltzaindiak gai honetaz argitaratu duena Euskal Gramatika. Lehen Urratsak I, 169. or. liburukian biltzen da (4.2.2.2 Predikatu osagarri mugatuak eta mugagabeak atalean): hor esaten da aditza izan denean, mugatzailea (-a) erabiltzea dela arruntena; baina badirela mugatzailerik gabe agertzeko joera duten zenbait adjektibo: zoriontsu, dohatsu, libre, berdin. Adibide hauek ematen dira: Zoriontsu zara? (=Zoriontsua zara?); Libre da gizona nahi duena egiteko; Guziok gara berdin.

Adjektiboak barik izenak ditugunean, hau dio Euskal Gramatika. Lehen Urratsak I, 170. or. liburukiak: ´[izenak] zerbait orokorra adierazten badu, nolabaiteko adjektibo modura edo interpreta daitekeena, zilegi da mugagabea ere´ (mugatuaz gain esan nahi da). Honako adibide hauek dakartza: Andoni irakasle da; Ni nerau naiz juez.

Beraz, bi egiturak dira zilegi, bai izenekin, bai adjektiboekin: Irakasle izan nahi dugu; Irakasleak izan nahi dugu.