JAGONET galde-erantzunak

Baldintza adieraztea: -z gero (ikasiz gero / ikasten badugu)

Nola berridatzi behar dugu -(e)z gero: alegia, ez-alegiazko ala alegiazko bezala?

Adibidez, Talibanek ez digute ikasten uzten, ikasiz gero aurre egingo diegulakoan esaldia nola berridatzi: ikasiko bagenu aurre egingo geniekeelakoan ala ikasten badugu aurre egingo diegulakoan?

Berridazketa: Talibanek ez digute ikasten uzten, ikasten badugu aurre egingo diegulakoan.

Aditz jokatugabean oinarritzen den baldintzazko forma horrek (-z gero), berez, bietarako balioko luke, aditzaren forma jokatugabeak ez baitigu era horretako informaziorik ematen: ez digu adierazten alegiazkoa ala ez-alegiazkoa den. Hori da forma jokatugabeek duten alde ona (edo alde txarra, nondik begiratzen diogun).

Kasu honetan izan dezakeen balioaren aztarna bakarra, pista bakarra, baldintza-perpauseko ondorioko aditzak (EGINGO DIEGULAKOAN formak) eman diezaguke: Talibanek ez digute ikasten uzten, ikasiz gero aurre egingo DIEGULAKOAN. DIEGULAKOAN aditza erabiltzen badugu, -(e)z gero forma ikasten baduguren baliokide da.

 

Informazio gehigarria:

Zalantza-mota: morfologia > aditz-jokoa, sintaxia > aditza, sintaxia > perpausak

Unitate-mota: hitzak-aditzak > adizki jokatuak, hitzak-aditzak > adizki ez-jokatuak, hitzak > menderagailuak, perpausa > baldintza

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper