Gaztelaniazko ‘ser divisible por’ eta frantsesezko 'être divisible par' modukoak euskaraz nola behar duten esatea ez dagokio berez Euskaltzaindiari. Euskaltzaindiaren Hiztegian [EH:zatitu] eta [EH:zatigarri] hitzak ageri diren arren, ‘ser divisible por’ / 'être divisible par' modukoen euskarazko ordainik ez dago bertan, ezta adibideetan ere.

Edozelan ere, esan behar da galderan ageri diren aukeretako bat bakarra dela egokia: Biz zatigarria da (eta horren kide den Birekin zatigarria da). Beste biak okerrak dira, beste hau ere okerra den bezala: *Birengatik zatigarria da.

Adibideak: 9 zenbakia 3z zatigarria da. Zenbaki bat 3z zatigarria da haren zifren batura 3ren multiploa bada. Zenbaki bat 4z zatigarria da haren azken bi zifrak 0 edo 4ren multiploak badira.

Egokia da, orobat, Hezkuntza Saileko EIMAren estilo-liburuak proposatzen duen -z zatitu esapidea ere (eta, jakina, molde berean, -z biderkatu): 9 zenbakia 3z zatitu daiteke. (Morfosintaxiaren inguruko zalantzak eta argibideak (EIMA), 122. or., Zientzia eta teknikako euskara arautzeko gomendioak (EIMA), 86. or.)