Ez dauka zertan joan beti mugagabean. Aski da Euskaltzaindiaren Hiztegia [EH:arraio] eta Orotariko Euskal Hiztegia [OEH:arraio] kontsultatzea horretaz ohartzeko. Adibideek erakusten dutenez, gehienetan interjekzio modura erabiltzen da; nolanahi ere, adjektibo modura ere joka dezake.

Egia da galde-perpausak ―eta halakoak dira galderako gehienak ere― mugagabean datozela gehienetan (Nondik arraio zatoz?, Non arraio utzi duzu liburua?...), baina artikuluarekin edo/eta kasu-markaren batekin ere sarritan ageri da: Arraioa!, tabakoa ahaztu?, Nork arraiok izenpetu du hori?, Zer arraiogatik egin duzu hori?, Ni oso-oso kezkatua nengoen, arraiotan!