Litroaren sinboloari dagokionez, bi moldeak dira onargarriak; alegia, larriz eta xehez idatz daiteke sinboloa: 2 L ur edo 2 l ur. Hala dago jasoa Euskaltzaindiaren 197. arauan.

Litroaren sinboloa da bi modutan idatz daitekeen bakarra (L zein l), nazioartean hala erabakirik.

Oro har, neurri-izenak adierazteko, nazioarteko sinbolo estandarrak erabili behar dira. Batzuk letra xehez idazten dira (adibidez, m metroaren sinboloa da), beste batzuk larriz (adibidez, V voltaren sinboloa da) eta beste batzuk letra xehe eta larri bana dutela (adibidez, Hz hertzaren sinboloa da); eta denak idazten dira zenbakiaren ondoren hutsunea dutela eta sinboloa punturik gabe.