L.G. da idazkera egokia, Euskaltzaindiaren 196. arauan jasoa dagoenez. Hau da, laburduratzat hartzen du Euskaltzaindiak, eta, horrenbestez, jartzekoak dira puntuak, laburdura guztietan bezala. Gainera, bi letrak larriz idatzi behar dira.

Laburdura letra larriz edo xehez idaztea laburtutako hitzen araberakoa da, baina ez beti.

• Oro har, lexiko arrunteko izenen laburdurak letra xehez idaztekoak dira: g.b. (goian bego), fis. (fisika), hed. (hedaduraz)… Baina badira zenbait laburdura letra larriz idazten direnak, izen arruntak ordezkatzen badituzte ere: P.D. (post data), P.S. (post scriptum), N.B. (nota bene), O.E. (ontzat emana)...
• Izen berezien edo haien baliokide diren adierazpen izendatzaileen laburduretan, izen berezia ordezkatzen duen letra larriz idazten da: K.a. (Kristo aurreko), K.o. (Kristo ondorengo). Izendapen osoko izenak bereziak badira, larriz hasita idazten dira laburdurak: Kd. Zib. (Kode Zibila)…
• Posta-kodea izendapenaren laburdura ez da berariaz ageri 196. arauan; bai, ordea, p. (posta) eta kd. (kodea). Horren arabera, eta lerro-hasieran kokatu ohi dela kontuan hartuta, P.-kd. edo P. kd. idatziko genuke.