Jagonet

Oso ugariak dira Europan —eta Europatik kanpo ere ez dira gutxi— amaieran -burg (alemanez, ingelesez), -bourg (frantsesez), -borg (danieraz, norvegieraz, suedieraz), ‑borough, ‑burgh (ingelesez)... osagaia duten leku-izenak.

Leku-izen horietako gutxi batzuen grafia egokitu egiten da euskaraz, tradizioa dutelako edo oso ezagunak direlako, baina gainerako guztiak ez. Salbuespenak, hau da, euskaraz jatorrizkoan ez bezala idazten direnak (hala araututa daude) zortzi hauek dira:

Brandenburgo (Alemania; alemanez, Brandenburg)

Edinburgo (Eskozia; ingelesez, Edinburgh)

Estrasburgo (Frantzia; frantsesez, Strasbourg)

Friburgo (Suitza eta Alemania; frantsesez, Fribourg; alemanez, Freiburg)

Hanburgo (Alemania; alemanez, Hamburg)

Luxenburgo (Luxenburgo; luxenburgera, Lëtzebuerg; alemana, Luxemburg; frantsesa, Luxembourg)

San Petersburgo (Errusia: errusiera, Санкт-Петербург, Sankt-Peterburg)

Salzburgo (Austria; alemana, Salzburg)

1995ean Euskaltzaindiak munduko estatuen araua onartu zuenean (38. araua), bi forma onartu zituen Luxenburgo estatuaren izen gisa: Luxenburgo eta Luxemburg. Horretaz gainera, ohar batean zehaztu zuen grafia bikoitzak onartzen zirela hiri-izen hauen kasuan ere: Friburgo edo Fribourg, Hanburgo edo Hamburg, Edinburgo edo Edinburgh, Estrasburgo edo Strasbourg eta Salzburgo edo Salzburg. 2019an, ia 25 urte geroago, munduko estatuen araua eguneratu zuenean, ikusirik Luxenburgo aldaera zela, alde handiz, erabiliena eta leku-izen garrantzitsuetan aldaera arautu bakarra izatea komeni denez, forma bakarra uztea erabaki zuen Euskaltzaindiak, bai eta, arrazoi beragatik, beste hainbeste egitea 1995eko oharrean onartu ziren bost hiri-izen haien kasuan; hau da, harrezkero, Friburgo, Hanburgo, Edinburgo, Estrasburgo eta Salzburgo dira forma arautu bakarrak.

Zortzi salbuespen horiek kenduta, Europan -burg, -bourg, -borough, edo -borg amaiera duten gainerako leku-izenetan ez da egokitzapenik egiten, eta tokian tokiko idazkera atxikitzen dute euskaraz ere. Adibidez, era horretako zenbait leku-izen ageri dira 154. eta 157. arauetan (Europako eskualde historiko-politikoak eta Europako hiriak):

Alemanian, Augsburg, Mecklenburg-Aurrepomerania, Coburg, Duisburg, Ludwigsburg, Lüneburg, Magdeburg, Marburg, Oldenburg eta Würzburg; Frantzian, Cherbourg; Suedian, Göteborg; Errusian, Jekaterinburg eta Orenburg; Herbehereetan, Limburg.

Beraz, arauetan zehaztuta ez ageri arren, amaiera horiek dituzten Europako gainerako leku‑izenak ere bere horretan idaztekoak dira euskaraz. Adibidez:

Alemanian, Bitburg, Flensburg, Günzburg, Rottenburg am Neckar, Lauenburg, Ladenburg, Neuenbürg. Belgikan, Oudenburg. Herbehereetan, Middelburg, Valkenburg aan de Geul. Suitzan, Burg. Erresuma Batuan, Queenborough, Kingsburgh, Oldborough, Newborough, Stoborough, Oxborough, Ludborough, Guisborough, Emborough, Marlborough.

Beste hainbeste Europatik kanpoko leku-izenetan ere. Adibidez, Hegoafrikar Errepublikan, Johannesburg, Julesburg, Queensburgh eta abar; Australian, Kingsborough, Marlborough, Kingborough, Maryborough eta abar; Estatu Batuetan eta Kanadan, Harrisburg, Evansburg, Emmetsburg, Fredericksburg, Frenchburg, Gettysburg, Gibsonburg, Hardinsburg, Harrisonburg, Hattiesburg, Middelburg, Millersburg, Pearisburg, Petersburg, Plattsburg, Spartanburg, Swedesburg, Vanceburg, Wellsburg, Williamsburg eta abar; eta beste hainbeste Karibeko San Martin uharteko Philipsburg hiri-izenaren kasuan ere.