Euskara Batuaren Eskuliburua

Euskaltzaindiak ez du berariazko araurik eman zenbaki hauei buruz, baina, ohituraz, zenbait egoera eta kasu berezitan, sinbolo erromatarrak erabiltzen dira berariaz zenbaki ordinalak adierazteko (→ zenbaki ordinalak). Hauetan bereziki:

- Dinastietan (pilotariak, errege-erreginak, aita santuak...): Olaizola II.a, Luis XIV.ak esandakoa, Berasaluze IX.aren jokaldi ikusgarria, Benedikto XVI.aren entziklika... Ordinala beti deklinatzen da (erreparatu adibideetako letra etzanei), baita aposizioetan ere: Justiniano I.a > Justiniano I.a enperadorearen garaian... / *Justiniano I. enperadorearen garaian...; beste hainbeste egiten da jatorria aipatzen denean ere: Jakue II.a Ingalaterrakoa / *Jakue II. Ingalaterrakoa.

- Mendeak adieraztean: Eliza erromanikoak X. mendean hasi ziren eraikitzen. Einstein XX. mendeko zientzialari aukeratu zuten. XVII eta XVIII. mendeetan gertatu zen hori / XVII. eta XVIII. mendeetan gertatu zen hori.

- Data laburturik idazteko, bi molde hauek erabiltzen dira: 2007-X-20 eta 2007-10-20. (→ data nola eman)

- Jaialdiak, biltzarrak, olinpiar jokoak, txapelketak, sariketak, kontzilioak eta antzekoak: Eguberrietako III. Jaialdia, Abokatuen Elkargoaren X. Biltzarra, XXX. Olinpiar Jokoak (Londres, 2012), Vatikanoko II. Kontzilioa... Idatzi beharreko zenbakiari konplexuegia irizten bazaio, erraztasunagatik, zenbaki arabiarretara jotzen da: 78. Munduko Xake Txapelketa.

- Itsasontzi eta beste ibilgailu batzuen izenak: Titanic II.a; Nautilus X.a.

- Ordinala eta hari dagokion hitza ezin dira bereizi bi lerrotan. Joan XXIII.a [*Joan//XXIII.a].