Euskara Batuaren Eskuliburua

Erregistro jasorako inoiz muzin egin izan bazaio ere, gaur egun ez du halako gutxiespenik, kausazko zentzuarekin, idazle onenek ere erabili duten egitura baita. Egitura ohikoena honako hau da: <nola... -(e)n/bait>, <nola... -(e)n> aldaera, normalean, mendebaldean; <nola... bait->, berriz, ekialdean nagusiki. Baina nola zituen oinak txit arinak, ihes egin zien erraz. Nola nire larrua den aski handia, nirekin egin nahi du segurki zahagia. Nola han bainaiz sortua, han dut utziko mundua, galtzen ez badut zentzua. Gu bizi ginen etxea nola baitzegoen Lezoko partean (...).

Taxu bereko perpausak osatzen dira bizkaieraz <zelan... -(e)n> egiturarekin: Eta zelan baraua den eginbiderik onena eta egokiena (...).

Esanahiz, horien pareko esaldiak osatzen dituzte, besteak beste, -(e)nez edo -(e)nez gero egiturek. Baina nola oinak zituen txit arinak, ihes egin zion erraz / Baina oinak txit arinak zituenez (gero), ihes egin zion erraz. (→ -(e)nez, -(e)nez gero)