filosofia
1 iz. Gertakarien lehen oinarriez eta izadiaren funtsezko nolakotasunaz, ahalik eta modu orokorrenean jabetzea helburutzat duen jakintza; jakintza horri buruzko gogoeta egituratuen multzoa. Filosofia-sistemak. Filosofiaren adarrak. Nekez izango da gaur filosofiarik jakintza oinarri sendorik gabe. Harrimena da filosofiaren lehen iturburua. Filosofia irakaslea. Filosofia-Letren Fakultatea. Descartes-en filosofia. Filosofiaren historia.
2 iz. Jakintzaren adarra, jakintza-arlo jakin baten printzipio nagusiez aritzen dena. Zuzenbidearen filosofia. Argitaratu berria den Dogmak zientzian? zientziaren filosofia alorrean kokaturiko liburua da.
3 iz. Bizitzari eta munduari buruzko pentsamoldea. Halabeharra, euskaldunen filosofia zaharra! Baikortasunez bernizatua egonagatik, Kavafisen poema ezagunaren filosofia berbera du azpian testu honek ere. Andre Venanciak, bere filosofia bitxi harekin, ez zuen onartzen iritzi hori.
4 iz. Jarduera batean aintzat hartzen diren irizpide nagusiak. Hazten doan arren, hasierako filosofiari eusten dio festibalak, "kulturen arteko elkar ezagutzari", hain zuzen ere. Hona Baionako argitaletxe honek bere liburuetan hedatzen duen filosofia: "Gure liburuek pentsamendu librea eta plazera hedatzea dute xede". Bide berriak irekitzeko filosofia horrek gidatu du The great destroyer disko berriaren grabazioa ere. Enpresa mundura ez ezik, gizarte osora zabaldu da kalitatearen filosofia.