Euskaltzaindiaren Hiztegia

forma=franko 3 sarreratan aurkitu da.

franko1

1 zenbtz. Asko. (Mugagabean erabiltzen da eta dagokion izen sintagmaren ezkerrean edo eskuinean jar daiteke; dagokion izena zenbakarria denean, aditzarekiko komunztadura singularrean nahiz pluralean egin daiteke). Duela franko urte. Hura entzutea bera sobera zaie franko gizon eta emazteri. Urepelen badira ehiztari franko. Deabru franko badela santu itxura hartzen duenik. Ezkondu eta izaten baita gero komeria franko. Hitz berri franko hartu duelako erdaratik. Garai batean, neronek ezagutu ditut maisu-maistra euskaldun franko gure artean. Etxe frankotan ikusten den gauza. Bada, horrezaz gainera, galesez dakienik franko Ingalaterrako zenbait hiritan. || (Dagokion izena ezabaturik). Baina aberatsei, emana emanik ere, franko gelditu zitzaien. Franko baitira, zereginari begira, estiloaz kezkatu ez diren euskal idazleak. Han kausituko dituzte herri anitz apaiz bakar batekin; haien aldean beste franko, apaiz bakar bat ere gabe.

2 adb. Asko, ugari. Franko ezagutzen nuen. Eta bekatua hain franko dabil kristauen artean! || (Dagokion izen sintagma mugaturik agertzen dela). Zugatik pasatzen dut nahigabea franko. Hirian ikusi dut herritarra franko. Isurarazi diotela negarra franko. Haurra franko izango du zure semeak. Bazterra franko badiat korriturik. Urtea franko dauka horrek bizkarrean. Indietan dut senarra, dirua franko duena. Nirekin nola jokatu zaren jendea frankok badaki. Lana frankorekin, baina zezena beti zutik. Musika soinu ederra franko aditua da kalean. Etxe galanta franko aurre ederrekin. Urteak franko baditu eta urdindu zaio burua.

3 adb. Oso. Irria franko zuhur zuen. Franko trebea dela artzain kontuan. Franko polita. Grina gaiztoan iragan ditut egun batzuk franko txarrak. Franko ongi dabil oraino. Franko aspaldi. Franko harriturik.

4 adb. Aski, nahikoa. Odol ihintz bat franko zen gure erospenarentzat.

frankotan adb. Askotan, maiz. Frankotan esana. Gorriak ikusi behar izaten zituzten frankotan. Frankotan kanpora irteten zait bihotza malkotan.

franko2

iz. Erdi Aroan Frantzian kokatu zen herri germaniarreko kidea.

franko3

iz. Hainbat herritako diru unitatea.

CFA franko Frantses kolonia izandako Afrikako herrialde batzuetako diru unitatea.

franko burundiar Burundiko diru unitatea.

franko djibutiar Djibutiko diru unitatea.

franko ginear Gineako diru unitatea.

franko komoretar Komoreetako diru unitatea.

franko kongoar Kongoko diru unitatea.

franko ruandar Ruandako diru unitatea.

franko suitzar Suitzako eta Liechtensteingo diru unitatea. Horrez gain, UCIk 10.000 franko suitzarreko isuna ere jarri dio Frantziako Federazioari.

Oharra: azken eguneraketa 2019-07-09

  • Euskaltzaindia - Real Academia de la Lengua Vasca - Académie de la Langue Basque
  • Plaza Barria, 15. 48005 BILBO
  • +34 944 158 155
  • +34 944 158 144
  • info@euskaltzaindia.eus
© 2015 Your Company. All Rights Reserved. Designed By JoomShaper