Andres Urrutia euskaltzainburuak lan honen “garrantzia eta arrakasta” aipatu ditu aurkezpenaren atarian, eta adierazi du lan baliagarria dela “ikertzaileentzat, hizkuntzalarientzat eta euskararen erroez interesa duen edonorentzat”. Era berean, Xarles Videgain euskaltzainburordeak ongi etorria eman die Joseba Lakarra EHHE 200 egitasmoko arduradunari eta Julen Manterola laguntzaileari, eta, bide batez, ikerlariek egitasmo honetan eginiko lana goraipatu du.
Julen Manterola EHHE 200 proiektuko koordinatzaileak obraren emaitzak eta aurrerapenak azaldu ondoren, gaskoieraz diren adibide batzuk hartu ditu liburuaren egitura azaltzeko, eta Lapurdin, Behe Nafarroan eta Zuberoan Erdi Arora itzuli da Ipar Euskal Herriko entzuleei azalpenak ematean.
'Ghero'
Arratsaldean, Euskaltzaindiaren beste hitzordu bat izan da Baionan, Michel Portal Antzokian. 14:30ean, Tartean antzerki konpainiaren azken lana ezagutzeko aukera izan du Ipar Euskal Herriko publikoak, Baionako Hiriarekin eta Euskal kultur Erakundearekin partaidetzan eskaini den hitzorduan. Ghero-k azken euskaldunari buruz dihardu balizko etorkizun batean; elkarrizketa ausartak eta tonu gazi-gozoa erabiliz, fabula bikaina ondu dute Tartean-ekoek, jada Euskal Herriko 40 bat antzokietan ikusi den pieza.