Euskaltzaindiak mendeurrenaren baitan antolatzen duen seigarren jardunaldi akademikoa ostegunean eta ostiralean izango da, Akademiaren Bilboko egoitzan (Plaza Barria, 15). Parisko ITEM-ekin (Institut des textes et manuscrits modernes) batera antolatu du jardunaldia Euskaltzaindiak, eta hainbat hizkuntzarekin lanean diharduten idazleek erabilitako artxibo, eskuizkribu eta inprimakiak aztertuko dira bertan, hau da, itzalean geratzen den lana.
Aurelia Arkotxa euskaltzain eta jardunaldiko koordinatzaileak agertu ditu biltzar berriaren helburuak: “Idazlearen tailerrean geratzen den mundu aberats hori aztertu nahi dugu, horretaz gogoeta egin, Iberiar geografian agertzen diren berezitasunei erreparatuz, eta, bereziki, euskal eremuan agertzen direnei”.
Guztira 26 hizlari egongo dira, besteak beste, Aurelia Arkotxa bera (Euskaltzaindia), Bernardo Atxaga (Euskaltzaindia), Olga Anokhina (ITEM), Delfina Cabrera (La Platako Unibertsitatea), Rainier Grutman (Ottawako Unibertsitatea), Mari Jose Olaziregi UPV/EHU), Max Hidalgo (Bartzelonako Unibertsitatea), Joseba Lakarra (Euskaltzaindia-UPV/EHU) edo Miren Ibarluzea (UPV/EHU).