"Orain arteko ibilbidea elkarrekin egin dugulako, sari hau euskaldun guztiontzat da"

: 09 Maiatza 2019

Ibilbidearen Elkar saria jaso dute Eusko Ikaskuntzak eta Euskaltzaindiak. Bi erakundeek ehun urtez eginiko lana aitortu nahi izan du Elkar Fundazioak.

Miriam Urkia Euskaltzaindiaren Gipuzkoako ordezkariak esker onez hartu du saria, Akademiaren izenean. Bere mintzaldian Eusko Ikaskuntza zoriondu du Urkiak, eta, bide batez, Elkar Fundazioa bera ere bai: "Urteak daramatzagu elkarlanean, euskararen zabalkundean elkar hartuta; eta ez zabalkundean bakarrik, gure ikerketa-lanetarako hornitzaile ezin hobeak zarete-eta, edukiak hain eskuzabal gure esku jarrita".

M. Urkia: "Aurrerantzean ere zuen eta euskalgintza osoaren laguntza beharko dugu, bakarrik ez baikoaz inora".

Urkiak gogoratu du 100 urte daramatzala Euskaltzaindiak "euskararen lurralde osoan euskara ikertzen eta jagoten, beti talde-lanean, ahalik eta eragile gehienen parte-hartzea sustatuz", berezko duen "zerbitzu bokazioari" eutsiz. "100 urte bete ditugu, baina aurrera begira jarrita gaude -azpimarratu du euskaltzain gipuzkoarrak-, erronka berriei aurre egiteko prest, gizartearen beharrei begira erantzun egokia eman ahal izateko. Eta aurrerantzean ere zuen eta euskalgintza osoaren laguntza beharko dugu, bakarrik ez baikoaz inora". Sari berri hau "euskaldun guztiontzat" dela esan du Urkiak, "orain arteko ibilbidea elkarrekin egin dugulako". Eta agindu du aurrerantzean ere Euskararen Akademia saiatuko dela "saria benetan merezi izan duela erakusten eta hobetzen".