Plazaberri

Sestaori buruzko lehen euskarazko liburua

  • Jorge Luis Tejedor ikerlariak 'Sestaoko toponimia' liburua agertu du jendaurrean, bertan Sestao herri zahar berriaren bilakaera historikoaren ezagutzarako ekarpen preziatua egiten duela.
  • Sestaoko Udalaren eta Euskaltzaindiaren laguntzarekin plazaratu da 'Izenak' bildumako liburu berria.
  • "Liburu honek urre gorria balio du, Sestaoren historia txiki baina inportante bat dagoelako hor, toponimiaren eskutik ezagutu daitekeena", esan du Adolfo Arejita euskaltzainak, gaur egin den prentsaurrekoan.
  • Hori bera azpimarratu nahi izan du egileak ere. "Bost-sei urteko lanaren emaitza da liburu hau, ia-ia sei mende hartzen ditu eta nabarmendu nahi dut toponimia eta historiaren artean dagoen erlazio estua; honela, liburuan herri arruntaren bizimodua islatzen da, inguru eta naturarekiko izenak agertzen baitira barra-barra", aitortu du Jorge Luis Tejedorrek.

    IMG 2043
    (Luis Alonso kazetaria, Josu Bergara herriko alkatea, Adolfo Arejita euskaltzaina eta Jorge Luis Tejedor ikertzailea, gaurko agerraldian)

 

Sestaoko toponimia, agerian

  • Jorge Luis Tejedor ikerlariak Sestao herri zahar berriaren bilakaera historikoaren ezagutzarako ekarpen preziatua egiten du lan zorrotz eta mamitsu honetan.
  • Bihar aurkeztuko da liburua, 11:00etatik aurrera, Sestaoko Udal Liburutegian.
  • Egileak udalerriko toponimoak (auzoak, ibaiak, lekuak, elizak, etxeak, baserriak, moilak eta abar) aurkezten dizkigu lan interesgarri honetan. Erregistro bakoitzaren azterketak testuinguru historikoa eta metalinguistikoa gorpuzten ditu eta, horrenbestez, ezagumen bide anitz libratzen ditu, nahi beste proiekzio ahalbidetuz.
  • Gainera, herriaren bilakaera historikoaren ezagutzarako oso ekarpen preziatua egiten du, etimologia zientziaren eremutik ikusita. Ezin ahaztu baita, onomastika lana den aldetik, herrialde honetako izen propioen katalogoa izatearen balioa bera, bai filologikoa, bai historikoa.

    Tejedor
     

 

Harrera ona izan dute Euskaltzaindiaren Hiztegia ondo erabiltzeko antolatu diren saio praktikoek

  • EIZIEko bazkideentzat antolatu dira saio hauek, eta urtarrilaren 24an eta 25ean egingo dira, Donostian eta Bilbon. 17:00etan hasi eta 19:00etara arte luzatuko dira.
  • Egitasmoan 52 lagunek parte hartuko dute.
  • Helburua? Euskaltzaindiaren Hiztegi berriaren bertsio digitala ondo erabiltzeko eta bilaketak ahalik eta modu eraginkorrenean egiteko gako batzuk eskaintzea.
  • Hiztegiaren arduradun eta koordinatzaile diren Andoni Sagarna eta Miriam Urkia arituko dira zeregin horretan.


 

"Euskarak behar ditu hizkuntza politika adostua eta halakoa egiteko foroak"

  • Bere laugarren agintaldia hasi berri, Andres Urrutia euskaltzainburuak orain arte egindakoak errepasatu eta etorkizuneko erronkak seinalatzen ditu elkarrizketa zabal eta mamitsu honetan. Besteak beste, euskara estandarraren etorkizunari buruz hitz egin du: "Batua berriz asmatu baino, egokitu eta aitzina eraman behar da, premia berriak batuaren bidez adierazi ahal izateko”.
  • Autokritika ere egin du euskaltzainburuak, aitortuz badagoela zer hobetu eta zertaz arduratu: "Onartu beharra dago oraindik arazoak ditugula egiten ditugun egitasmoak edo hartzen ditugun erabakiak behar den bezalaxe gizarteratzeko".
  • “Euskalkietatik batua aberasteko katea berriz asmatu behar da. Baldin eta batua bizia nahi badugu”.
  • “Euskaltzaindia beharrezkoa izango da bere zereginak betetzen dituen neurrian, gizartearen premiei euskara eta euskal kulturaren alorrean erantzuten dien neurrian”.
  • “Kritikatzen gaituztela? Bizirik gaudelako seinale”.
  • “Euskaltzaindiak iraganean, orainean eta etorkizunean jarri behar du begia, halabeharrez, baina esfortzu berezia egiten ari gara teknologia berriak ezarri, zerbitzua eman eta gure lana gizarteratzeko".
  • “Euskaltzaindia ez da erakunde hertsia. Nekez aurkituko duzu Akademia hau baino erakunde zabal eta gardenagorik: gure aktak eta urteko egintza guztiak edonoren eskura daude, gure webgunean zein sare sozialetan eskegita”.

    Andres Urrutia, euskaltzainburua
    (Andres Urrutia, Euskaltzaindiaren batzar-gelan)

 

Plazaberrin harpidetu:

Sare sozialetan:

Twitter

 

 

Gure agendan harpidetu:

Azken argitalpenak

Argitalpen guztiak ikusi