Toponyms (Place names)

(...)
[-As/-az, -es/-ez, -iz, -os/-oz, -us/-uz bukaerak] Koldo Mitxelena ere arduratu da aztergai ditugun atzizkiez hain ezaguna den Apellidos Vascos liburuan [41-42, 62, 108-109. orr.]. Obra honetan Ardanaz, Aranaz, Idigoras, Iribas eta beste hainbat leku-izenetan azaltzen diren -a(t)z, -a(t)s bukaerez bakar-bakarrik maiztasun handikoak direla dio, beste azalpenik eman gabe. -I(t)z atzizkiaz mintzo denean bertan balio eta garai ezberdinetako "formazioak" biltzen direla nabarmentzen du. "Formazio" horien artean, beste autore batzuk azterturikoak aipatzen ditu: 1-Tz-ez akitzen diren beste atzizki batzuren kidea izan daiteke -i(t)z, beste horiek bezala, ugaritasuna adierazten duela: Othaitz (Oteyza), Olaitz… 2-Lehenik Aranak eta gero J. C. Barojak azpimarratu dutenez, antroponimoen gain taiuturikako -ici (< -icus) genitibotik erator daiteke zenbait kasutan: Albeniz (Albinici < Albinus), Apellaniz (A(m)pelici < Ampelius)… 3-Aspaldi ez duela beste toponimo edo deitura batzuren eratorriak sortzeko erabilia izan da: Aldama / Aldamiz, Arrona / Arroniz, Orba / Orbaiz… Laburpen moduan berak biltzen dituen izen gehienek euskal azalpenik ez dutela dio, ez eta, nahitaez, azalpen latino-erromanikorik ere.
(...)