Toponyms (Place names)

(...)
Mikel Gorrotxategi Nieto, Euskal Filologian lizentziatua, euskaltzain urgazlea eta Euskaltzaindiaren Onomastika batzorde idazkari denak, EGIAZTATZEN DU: Onomastika batzordeak, Iruñeko ordezkaritzan apirilaren 16an egindako bilkuran, beste gai batzuen hartean honako hau aztertu eta erabaki zuela. Bizkaiko Foru Aldundiak hauteskunde barrutien euskal izenez egindako eskaera aztertzen da. Batzordeak aurreko honako hauek hobesten ditu: 1. Enkarterri / Encartaciones. Edukiari dagokionez esan behar da hartzen dituen 20 udalerrietatik 18 historikoki eskualde historiko horretakoak izan direla, Barakaldo ere bai XV. mende arte, Alonsotegi udal berria delarik. Euskal izenari buruz ordea badago zer esanik. Euskaldunen artean erabilitako izena Enkartazioak izan bada ere, Enkartazioetan, Enkartazioetatik, etab. deklinaturik, azken urteotan Enkarterri izena nagusitu da, inoiz pluralean emanda, Enkarterriak. Azken izen hau pluralean zein sinugularrean erabili, izan da, gaztelaniazkoa bezala izan ere, Encartaciones ondoan Tierra Encartada eta La Encartación ere erabili izan dira. Kontuan izanik euskaraz tierra edo territorio adierazteko herri erabili izan dela, eta Bizkaiko toponimian izen hau artikulurik gabe agertzen dela: Txorierri (tierra o país de pájaros, Miguel de Unamuno eta Mikel Zarateren hitzetan), Goierri, (Gipuzkoako eskualdea eta Bizkaiko zenbait udaletan gorengo auzoa), Baserri (Leioa eta Getxoko barrukaldea), Marinerri (Leioako itsasadar aldea), Beterri (Gipuzkoako eskualdea), Lizarrerri/Estellerri (Nafarroako merinaldea), etab. K. Mitxelenak eta Txillardegik Enkarterri formaren erabilera agertzen dute. Batzordeak Enkartazioak izen tradiziokoarekin batera Enkarterri izena onetsi zuen. 2. Bilbo / Bilbao. Izena onargarria da zeren eta hiriburuaren izena eta eremua bakarrik hartzen baitu. 3. Durango-Arratia. Izen egokia da zeren eta bi merinalderen izenak hartzen baititu eta euskal izen egokiak baitira. Eremuari buruz esan behar da gehiengoa horkoa zela. 4. Busturia-Uribe. Aurreko kasuetan bezala izen egokiak dira bai hizkuntza aldetik, euskal toponimoak baitira, baita historia aldetik ere, udalerri guztiak, bi salbu, merinalde horietakoak baitziren. Bilbo, mila bederatzirehun eta lauregeita hemeretziaren apirilaren hemeretzian.
(...)