(...)
Elkea-k 'alor landua', 'alor iraulia' adiera dauka (cf. Galipentzuko La Elka toponimoa). 1602an beste toki batzutan arrunta den Elgea aldaera aurkitzen dugu (cf. Gipuzkoako Elgeta herri-izena). Dena dela, Elkea eta Elketxipia ere badugunez, 1602ko belare ahostuna nahasketa baten fruitu ez ote den pentsa dezakegu. 1596an, gainera, kontsonante ahoskabedun aldaera agertzen da. Elkea 1850erako Arkea bilakatua zen, eta egun ere Arkea [arkéa] esaten da. Barranco de Elkea beheragoko Barranco de la Virgen edo Barranco de Arangaitz bera da, eta Fuente del Serenado-n du hasiera. Elkea-k ehun bat erreguneurritako hedadura dauka, eta lehen partzelak baziren ere, egun behiak larretzeko prestatua dago. Orain urte batzu Julioko mugako Fuente de los Fayales iturriaren uraz hornitzen den idoi berria egin zuten bertan, aziendentzat. Dermio honek Pinar de los Cerros, La Virgen eta Larrasoil-ekin mugatzen du. Elkea > Arkea pausoa desitxuraketa baten fruitu da, eta ez dago bilakaera hau zehazten duen araurik. Hoyo de Elkea Elkea bera da, dermio hau errekak sortu zulo moduko harana baita.
(...)