(...)
Honen oinarrian *Lejona-ren moduko bat egon liteke. Hemendik bokal arteko n leunaren erortzeaz *Lejoa aterako zen, eta hemendik Lejua (cf. Nafarroan Olexoa > Olejua). *Lejona hori zer den ez dakigu, baina badirudi Artaxogoiena aztertzean (ikus sarrera hau) aipatu dugun -ona bukaera hemen ere azaltzen dela. Azentuaketa ere proposatzen den iturriarekin bat dator, gaurregun, belare epentetiko batez, Lejuga [lexúga] esaten baita (cf. Lejóna, Leióa) [Honek ez du asko frogatzen, gaztelaniaz azentua hondar-aitzineko silaban jartzeko joera dagoelako. Joera hau areagotu baizik ez da egiten gure alderdian eta Nafarroako Erriberan.]. Lejua ibai ondoko, Camino de Murillo-ren inguruko lur-zerrenda luze eta estu bat da, Sanzolportilua-tik, El Ferial-eraino hedatzen dena. Mendebaldetik Zabaleta eta Billakukuru-rekin mugatzen du. Hemen bukatzen dira Aragoa ugaldera ura isurtzen duten Barranco del Rojo eta Barranco de Zabaleta (Barranco de Aristuziaga Uxuen). Azken honen ondoan, Camino de Murillo-tik hurbil, Fuente de Lejua dago, eta aipatu Barranco del Rojo-n egun ahiturik dagoen Fuente de Marradas zegoen orain urte batzu.
(...)