JAGONET galde-erantzunak
Zenbakiak: bat idaztea eta irakurtzea (1 metro / metro bat)
Euskaltzaindiaren 7. araua betez gero, fakturak egitean, adibidez, ez dugu inolako arazorik kopurua bat ez beste edozein denean. Baina kopurua bat edo unitate osoa ez denean, aldatu egiten da ordena. Beraz, argitu egin beharko diguzue nola idatzi eta nola irakurri horrelakoak. Esaterako, dendako testu hau:
Idatzi: 1 metro soka Irakurri: metro bat soka
Idatzi: 2 kilo mandarina Irakurri: bi kilo mandarina
Idatzi: 1,5 kilo madari Irakurri: kilo eta erdi madari
Euskaltzaindiak ez du galderan aipatutako kontua arauan azaldu. Hala ere, arauturik ez badago ere, bi idazkera-molde nagusi daude:
- Idazkera sinbolikoa: zenbakia digituz idaztea eta unitatearen sinboloa idaztea: 1 m soka, 2 kg mandarina, 1,5 kg madari.
- Idazkera ez-sinbolikoa: zenbakia letraz idaztea eta unitatearen izena idaztea: metro bat soka, bi kilo(gramo) mandarina / kilo(gramo) bi mandarina, kilo(gramo) eta erdi madari.
Irakurtze-modua: metro bat soka; bi kilo(gramo) mandarina / kilo(gramo) bi mandarina; bat koma bost kilogramo madari edo kilo(gramo) eta erdi madari.
Informazio gehigarria:
- "bat zenbatzailea" (EBE)
- "euro" (EBE)
- "sinboloak (nazioartekoak)" (EBE)
Zalantza-mota: morfologia > zenbakiak
Unitate-mota: joskera > hitz-ordena, zenbakiak > kardinalak
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.
