JAGONET galde-erantzunak
Lexikoa: arabera, arau (diotenaren arabera / *dioten arabera)
Batetik, arabera dela eta, badakit aditz jokatuekin ere <-(e)n + NOREN> egitura erabili ohi dela: adibidez, esaten dutenaren arabera. Galdera da ea ohikoa den -(e)n soilarekin erabiltzea: alegia, etortzen diren arabera bezalako esaldiak ohikoak ote diren euskaraz (‘etortzen diren neurrian/heinean/bezala’ zentzuan).
Bestetik, zalantza bera daukat arau hitzarekin: ohikoak al dira etorri diren arau gisakoak?
Euskaltzaindiaren Hiztegiak dioenez, [EH:arabera] hitzak -ren kasu-marka behar du aurretik: Hark esan omen zuenaren arabera gertatu dira gauzak. Literatura-tradizioan badira aurrean -ren gabeko erlatibozko esaldia dutenak, baina horiek salbuespentzat hartu behar dira.
Bestalde, arau dela-eta, Euskaltzaindiaren Orotariko Euskal Hiztegian ikus daiteke arau aurreko hitza izan daitekeela izena (-ren erantsita edo gabe), partizipioa edo aditzoina [OEH:arau II].
Informazio gehigarria:
- "arabera (arauera)" (EBE)
Zalantza-mota: morfologia > postposizioak, sintaxia > aditza, sintaxia > kalko baztergarriak
Unitate-mota: hitzak-aditzak, hitzak, joskera > kalko baztergarriak, lokuzioak/kolokazioak
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.
