35. arauaren arabera, minutu hitza ez bezala, laurden hitza mugagabean erabiltzen da normalean. Alegia, hirurak eta laurden esatea da usadio hedatuena, mugagabean. Beraz, mugagabeko beste sintagma guztiei bezala, -(e)tan hondarkia eransten zaio. Horrek ez du esan nahi —zenbait lekutan erabiltzen baita— gaizki dagoenik hirurak eta laurdenean, Euskaltzaindiak batasunerako mugagabeko formak bultzatzea erabaki duela baizik.

Gauza bertsua gertatzen da hamarrak laurden gutxian formarekin. Ezin daiteke esan gaizki dagoela, forma hori ere erabiltzen baita. Hala ere, batasunerako, hamarrak laurden gutxitan (mugagabeko forma) bultzatzea erabaki du Euskaltzaindiak kasu honetan ere, mugagabeko erabilera [hamarrak laurden gutxi d(ir)a] baita forma hedatuena.