Gramatika batzordearen ustez, forma hauek hobetsi behar dira: txanponak eurotan, txanponak euro(-)zentimotan, euro bat eta 5 zentimo, 10 euro(-)zentimo, 20 zentimo, 2 eurokoa, 5 eurokoa, 10 eurokoa, 50 eurokoa, 2 euro(-)zentimokoa, 2 zentimokoa, 5 zentimoko txanpona, 5 euro(-)zentimoko txanpona, 5 euroko billetea, 50 euroko billetea... Salneurria eurotan (*euroetan) adierazita dago.

Galderak egiteko, berriz, forma hauek onartzen dira: Zenbatean? (ez *zenbatetan) edo Zenbat eurotan/euroan? (biak zuzenak). Ez dira zuzenak mugagabea eskatzen duten galdetzaile eta determinatzaileekin osatutako *zein euroan, *edozein euroan eta gisakoak.

Erantzunak-eta, honela: 3 euroan/eurotan dago ardoa, 100 eurora/eurotara igo da salneurria, 500 eurotik/eurotatik gora ekarri (euroan, eurora, eurotik... zuzenak dira diru-kopuruak kantitate osoak direnean).

Txanponak: 1 euro (ahoz, euro bat esan), 2 euro, 1 euro(-)zentimo (ahoz, eurozentimo bat esan), 2 euro(-)zentimo, 5 euro(-)zentimo, 10 euro(-)zentimo, 20 euro(-)zentimo eta 50 euro(-)zentimo.

Billeteak: 5 euro, 10 euro, 20 euro, 50 euro, 100 euro, 200 euro eta 500 euro. Jakina, 34. arauaren arabera, 10 euroko billetea eta abar hobesten dira.

Hitz-elkarketaren bidez eman den euro(-)zentimo egituran, denboraren poderioz, lehen osagaia galduz joango da seguruenik, eta 2 euro(-)zentimo esan beharrean 2 zentimo esango da.

Txekeen idazkeraz, jo hona: "txekeak nola bete" (EBE) eta "Zenbakiak: txekeak nola bete" (JAGONET)

Dokumentua: EURO-A DELA ETA (irizpena) – https://www.euskaltzaindia.eus/dok/jagonet/Euroa.pdf