JAGONET galde-erantzunak
Aposizioak: ziurtagirietan
Ziurtagirietan, sintagma barruko aposizioaren eta sintagma aposatuaren erabilera dela eta, lasai erabil ditzakegu honako bi formak ala bigarren aukera hobetsi behar dugu?
a) Pello Urzelai Gabiola Eusko Legebiltzarraren Mahaiko Lehen Idazkari naizen honek ziurtatzen dut...
b) Pello Urzelai Gabiolak, Eusko Legebiltzarraren Mahaiko Lehen Idazkari naizen honek ziurtatzen dut...
Ziurtatzen dut lehen pertsonan erabiltzeak zailago bihurtzen du kontua. Ziurtatzen du erabili ahal izateak, berriz, ikaragarri erraztuko luke auzia, hirugarren pertsonarekin aukera biak lirateke-eta egokiak.
Baina ziurtatzen dut lehen pertsonan eman behar izanez gero, bi aukerak ontzat emanda ere, bigarrena da hobestekoa (erreparatu, nolanahi ere, komari):
Pello Urzelai Gabiolak, Eusko Legebiltzarraren Mahaiko Lehen Idazkari naizen honek, ziurtatzen dut...
Agian egokiagoa litzateke bigarren hori nik izenordaina aurrean erantsita:
Nik, Pello Urzelai Gabiolak, Eusko Legebiltzarraren Mahaiko Lehen Idazkari naizen honek, ziurtatzen dut...
Informazio gehigarria:
- "aposizioa eta komunztadura" (EBE)
- Dokumentua: Ziurtagirietan nola erabili sintagma barruko aposizioak eta sintagma aposatuak (irizpena) - https://www.euskaltzaindia.eus/dok/jagonet/Ziurtagiriak1.pdf
Zalantza-mota: morfologia > kasu-markak, morfologia > mugatzaileak, sintaxia > komunztadura
Unitate-mota: hitzak > determinatzaileak, komunztadura > aposizioak
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.
