Denak zuzenak dira.

Plural hurbila (denok, denontzat...) hurbiltasun fisikoa, psikologikoa eta denborazkoa adierazteko erabiltzen da; eta, oro har, hiztunak plural hurbila erabiltzen duenean bere burua barnean sartzen du. Adibidez: Irakasleen lan-egoera ez da ona (‘irakasle haiek’). Irakasleon lan-egoera ez da ona (‘gu irakasle langileok’). Eta primeran dago aipagai dugun taldea aurrez aurre dugunean ere, nahiz hiztuna taldean ez egon: Zuek, apaizok, ez duzue kolperik jotzen.

-tzat/-dako (eta baita -tzako ere) postposizioak baliokideak dira, euskalkien arabera, aditzaren osagarri direnean:

Norentzat/norentzako/norendako da hori? Ez dut ezer aurkitu amonarentzat/amonarentzako/amonarendako.

Galderako adibideak honela sailkatuko genituzke, beraz:

Plural hurbileko moldekoak:

Eskola publikoa denona denontzat / denondako / denontzako.

Plural arrunteko moldekoak:

Eskola publikoa denena denentzat / denendako / denentzako.

Baztanen ere, horrelako eslogan inklusibo baterako, plural hurbila erabiltzea ez litzateke desegokia. Beraz, bi aukera hauek egokiak dira:

Eskola publikoa denona denondako. Eskola publikoa denena denendako.