Datu onartua da mendebalde hitza mendebaletik datorrela, baina horrek ez du esan nahi egokiagoa denik, hitz bakoitzak bere adierak ditu eta.

Euskaltzaindiaren Hiztegian ikus daitekeen bezala ―[EH:mendebal], [EH:mendebalde]―, bi hitzak egokiak dira, baina ñabardura batzuk kontuan hartzea komeni da.

- Haizearen joa adierazi nahi bada, sinonimo gisa erabiltzen dira: mendebalak / mendebaldeak/ mendebal-haizeak / mendebaleko haizeak / mendebaldeko haizeak jotzen duenean…; eta ondorioz, ipar-mendebalak, ipar-mendebaldeak…

- Puntu kardinala adierazteko, mendebalde eta sartalde dira forma estandarrak Euskaltzaindiaren Hiztegian; adibidez, ipar-mendebalde eta hego-mendebalde eta ez ipar-mendebal eta hego-mendebal.

- Kultura edo eskualdea adierazi nahi bada, mendebalde erabiltzen da, sistematikoki, leku-izen arautuetan: Mendebaldeko Sierra Madre, Mendebaldeko Afrika Frantsesa, Mendebaldeko Saharra, Mendebaldeko Europa; Spengler-ek 1919an argitaratu zuen Mendebaldearen Gainbehera.