JAGONET galde-erantzunak
Salbuespena adieraztea: baino ez / bakarrik
Erabil dezakegu bakarrik forma baino ez erabiltzen den kasuetan? Horrela bada, esaldiaren zein tokitan jarri beharko genuke?
1. Hauxe baino ez diozu eman behar.
2. Hauxe bakarrik eman behar diozu.
3. Hauxe eman behar diozu bakarrik.
1. Larunbatetan baino ez da zabalik egoten.
2. Larunbatetan bakarrik egoten da zabalik.
3. Larunbatetan egoten da zabalik bakarrik.
Bai, erabil daiteke bakarrik forma baino ez erabili den kasu horietan, eta bakarrik horren kokapen zuzena adibideetako bigarren esaldi horietakoa da:
Hauxe bakarrik eman behar diozu.
Larunbatetan bakarrik egoten da zabalik.
Horrez gainera, ikus hauek ere: "Lexikoa: bakarrik / baino ez" (JAGONET), "Salbuespena adieraztea: baino ez, baizik eta, besterik ez" (JAGONET), "Kuantifikazioa adieraztea: Komunztadura (besterik ez, baino ez, baizik ez) (dut/ditut)" (JAGONET), "Kuantifikazioa adieraztea: besterik ez / baino ez (irakurri/irakurtzea besterik ez duzu)" (JAGONET).
Informazio gehigarria:
Zalantza-mota: lexikoa > orokorra
Unitate-mota: hitzak > adberbioak, hitzak > juntagailuak, joskera > hitz-ordena
Orrialde honetako dokumentu, zerrenda eta datu-baseak Creative Commons Aitortu-EzKomertziala-PartekatuBerdin baimen baten mende daude.
