Leku-izenak

(...)
Egungo Elizkun [èlizkún] (El Lizkun interpretatua) Aldeko Monte de Aldea eguzkialdearen jarraipena da, baina oihezkiari ere Elizkun esaten bide zaio. Iguzkun edo Iguzkunea beste toki batzutako egutera, eguzkialdea, eguzkiagerri, iguzpegi edo iguzkibegi-ren esanahikidea da, eta eguzkiak jotzen duen aldea ematen du aditzera. XVI. mendeko -g-dun aldakien ondoan, -r-dunak ditugu XVIII.ean: Yruzcun (1704) Altto de yruzcun (1771), Iruzcun (1774) eta hemen ere iguzki / iruzki izenean ohi den txandaketa bera dugula esan daiteke (cf., adibidez, Leatxeko Ygusqui agerria 1654ean, Yruzquiagerria 1708an). Izen hau Nafarroako beste herri batzutan ere aurkitzen dugu: Iguzkun, Iguzkunea dugu Morionesen, Iguzkun Ibargoitiko Zilegietan [Id., 25. k., 1647.], Iruzkun Ollakarizketan (Xulapainen), eta Iguzkun bailara bereko Gartziriainen [Eleizaldek Iguzkun ematen du bi herri horietarako, eta Iruzkun gainera bigarrenerako, Iguzkun-en aldaera gisa edo. Egun ordea, Ollakarizketan Iruzkun [irúzkun] esaten dute, 1673an Yguzcungoa dokumentatu arren (PRA-Atarrabia, 43. k.). Gartziriainen berriz, Iguzkun [igúzkun] baizik ez dugu gaur. Datu hauek bailara honetako toponimia bildu eta aztertu duten Mikel Belasko, Mikel Iriarte eta Juantxo Urdirozi zor dizkiegu.]. Iguzkun-ek Arangaitz, El Chaparro, Xaugizabal, Erbiñaga, Aldemuga, eta Zubialdea-ren mugatzen du. Alto de Iguzkun Aldea eta Eslabaren arteko muga-mugako gaina da (784 m.). Dokumentazioan ikusten denez (cf. 1587ko lekukoa) mendi "debekatua" izan zela dirudi, isun-tokia, alegia.
(...)