(...)
Izen hau *La Agudilla-ren zatiketa faltsu baten ondorioa izan daiteke. Izan ere, arrunta da toponimian agudo, zorrotza eta antzekoak mendi, muino, eta besterekin agertzea (cf. Monteagudo, Mendikute, Mendizorrotza, Munikotxorrotx, Puntazorrotz...), eta La Gudilla ere mendi ttiki baten izena da (cf. Fustiñañako Cabezo agudillo) [Nafarroako Diputazioaren 1975eko mapen arabera 532 metroko garaiera dauka.]. Guztiarekin ere, mendiko honen gailurra ez da punta zorrotza, gain luzeantza baizik, erdaraz Galipentzun "cantón" deitu ohi dutena. Kasedan *La Acutilla-tik atera ahal izan den La Cutilla [PRA-Kaseda, 4. k., 1687.] aurkitu dugu, Nafarroako erromantzez zenbait aldiz agitzen denez bokal arteko herskari ahoskabeak zeuden-zeudenean gorde direlarik. Leatxen Cotilla dermioa dugu, eta honen barruan Corral de Cotilla deritzana, baina honen eta Galipentzuko toponimoaren arteko lotura ez dago bat ere garbi. Egungo egunean Alto la Gudilla [áltolagudílla] deitzen dena Bardena-n dago, Plandeoliva eta Antoñanzas-en artean, Kasedako mugatik hurbil. 1712ko Costado de la Gudilla gaineko aldapa zela uste dugu.
(...)