(...)
Esan dugunez (ikus Lergako Valdecontienda sarrera), Valdecontienda izena Facería-ren adierakidea da gure alderdian, eta bi auzo herri lur eremu beraz baliatzeak sortzen zituen auzi eta liskarrei zor zaiela dirudi. Uxuen bi Valdecontienda ezberdin agertzen dira. bata gaurko Epaizko fazeria da. Bestea Mostrakas-en zegoen, Santakara eta Murilloko mugan. Kontuan eduki behar da Mostrakas Pitillasena ere bazela, Uxuerena ez ezik, eta Valdecontienda izena hortik etor zitekeela. Hau, halaz guztiz, ez zaigu horrela dela iruditzen, zeren Uxueko auzoa izan zen herri horrekiko beste dermio komunak aipatzean ez baita sekulan Facería edo Valdecontienda azaltzen. Errazago deritzagu gaur Larrageta deitzen den alderdia izateari, hau Murillo, Santakara eta Uxueko mugan egoteaz gainera, hiru herriotan bizirik (nahiz ez denetan indar beraz, nonbait) dirauenez gero. Portillo de Valdecontienda Epaizko fazeriako ate bat (zein?) zen.
(...)

(...)
Facería edo Facero larretako dagoen bi herriren (edo gehiagoren) arteko amankomuneko lur-puska da. Egun La Facería Epaiz eta Uxueren arteko mugako erronbo moduko alderdi bati baizik ez zaio esaten. Lehen, ordea, bazen Uxue eta Pitillasen arteko beste fazeria bat [Euskaraz ere fazeria eta fazero maileguak erabili izan dira, Zizur zendeako Faceria gaña, Faceria goiti (Faceria arriba-ren ondoan), Faceria legarreta, Faceria ondoa, Facero gaña, Facero muga, Facero pea, Faceriaco euncetoa eta bestek frogatzen digutenez (J. Jurío, TCPCC). Erdaraz Facería eta Facero-z gainera, Valdecontienda aurkitzen dugu, seguraski bi herri lur zati beraz baliatzeak sortzen zituen sesio eta ardailengatik (ikus Valdecontienda sarrera).] La Sierra-n, Abuñaga-tik hurbil, orain Uxuerenak bakarrarenak diren lurretan. Erreka ere bazen fazeria honetan. Ez dakigu zein izan zitekeen hau; Pitillas eta Uxueren amankomuneko La Sierra-ko dermioa Berage zen (gaurko Los Berros. Ikus Cinco Millares sarrera), eta badakigu 1800eko bereizkuntzaren ondoren ere bi herrientzat gelditu zela. Berage, halaz ere, ez dago Abuñaga-ko mugan, eta beste dermio bat zela pentsatu beharra dago, oraingo Urteaga beharbada, aipatu Abuñaga-ko mugan egoteaz landa hemen ere erreka bai baitago.
(...)