(...)
Puio edo Puiu 'gaina', 'muinoa' (cf. 1641eko Pujueta), eta -eta ditugu hemen. Izena gaztelaniazko pueyo (cf. (El) Pueyo Orbako herri-izena, Puiu euskaraz [Ikus NHI, 196 eta 262. orr.]), eta nafarrerako pui (cf. El Pui de Estella ezaguna)-ren kide dugu, eta gure hizkuntzan puiu, poiu eta boiu-ren ondoan azaltzen da (ikus Galipentzuko Puyalato eta Eslabako Boiugain toponimoak aztertzean dioguna). Puieta [puyéta] herriaren albotik, Mondela-tik, Mirabuenos eta Balora-raino luzatzen den mendia da, bi aldeetan Naba (Leatxe aldera) eta Plau goi-lautada (hegoaldean) dituela, eta ez da dudarik gaina delako duela izen hau. Camino de Aibar (behekoa) Naba eta Puieta-ren artetik zihoan.
(...)

(...)
Dokumentazioko eta oraingo Puieta bera dela uste dugu, toponimian Ø / -eta txandaketa, ikusi denez, arrunta delako.
(...)

(...)
[-Eta gure eskualdean] Toponimo guzti hauen azterketatik honako ondorio hauek atera ditzakegu: [...] 9.-Aniztasuna / batekotasuna [...] Beste anitzetan, ordea, -eta (-keta, -kieta) atzizkiak, -aga-k usu bezala, toki huts-hutsa adierazten du, toponimoak izendatzen duen entitatea bat bakarra delarik. Hau segurua da -eta-dun eta gabeko toki-izenak agertzen zaizkigun kasuetan (kasu gehienetan, ez denetan. Cf. Uxueko Mantxiriturria / Mantxiriturrieta). Honelakoetan -eta atzizkiaren eginkizuna oinarria izen arrunta ez dela ezagutzera ematea litzateke: Aitzandia / Aitzandieta (Uxue); Ardantzebarrena / Ardantzebarreneta (Ageza); Astalorraldea / Astalorraldeta (Moriones); Bidezarra / Bidezarreta (Eslaba); Butzuandia / Butzuandieta (Leatxe); Errotaxarra / Errotaxarreta (Leatxe); Gesaliturri / Gesaliturrieta (Zare); La árrega (Murillo), Larrage (Uxue) / Larrageta (Murillo, Santakara, Uxue) [Ikus, halaz ere, Uxueko toponimia aztertzean Larrage sarreran dioguna]; Meazuko erreka / Meazukoerreketa (Galipentzu); Monda / Mondakieta (Lerga); Mugazuria / Mugazurieta (Uxue); Puio / Puieta (Zare); Saratsa / Saratseta (Zare); Sariozarra / Sariozarreta (Moriones); Sortengortea / Sortengorteta (Eslaba); Zazutxikia, Zazutxipia / Zazutxipieta, Zazutxikieta (Eslaba); Zerradogibela / Zerradogibeleta (Eslaba)... Beraz zera ondoriozta dezakegu, -eta-k usu askotan tokitasuna markatzen duela, eta hortaz, aniztasuna edo batzutasuna gabe, batekotasuna adierazten duela. Hau da, adibidez, Agezako Cruz de Gurutzeta-n daukaguna, gurutze bakarra zela garbi dakigunez gero.
(...)

(...)
[-Eta gure eskualdean. Zare] Puiu edo puio 'gaina', eta -eta-z osaturik dago. Oinarriaren jatorrizko hondar bokala -u nahiz -o izan zitekeen; 1641ean Pujueta ediren dugu [PRA-Oibar, 24. k.], baina hau lekuko bakarra da, eta aurreko *Puioeta batetik ere atera zitekeen. Puieta-rekin batera Puio ere azaltzen da, eta mintzagai dugun toponimoak puiu bakarra adierazten duela seguru samarra da. Egungo Puieta [puyéeta]-k erdaraz "cantera" deitu ohi dena (mendiko luzea) izendatzen du (inguruko lurrak ere bai. Ikus Zare).
(...)