(...)
Mitxelenaren arabera [AV, 47. or.] andua-k 'mahatsondoa' adiera dauka, baina ez dakigu hori den hemen duguna, gure eskualdean ardantzeak, nobelak... eta beste oso ugariak direla ezin uka badaiteke ere. Toponimo honen eratorrietan ikus daitekeen bezala, Andua-ren bukaerako -a hori kendu-utzizkoa da. Egun Anduba [àndúba] ebakitzen den hau (Ikus -oa > -oba, -ba eta -ua > -uba-z Aldaiondoa sarreran esan duguna) Santsoainzabal, Txirrialdea, Los Castillos, Errekina eta Errotabidea-ren artean dago, herritik ez oso urruti. Anduba aldakiaren lehen lekukoa 1793koa da, eta beraz tarteko ezpainbikoa erdararen eraginari zor zaiola segurua da. Dokumentazioko Andua alto euskarazko Andugoiena-ren ordain erdalduna dela garbi dago (ikus azken sarrera hau). Barranco de Andua Errekina-tik gertu sortu eta Barranco de Ikaiburu-raino doan erreka da. Paso de Andua euskarazko Anduko pausua edo Andupausua-ren ordaina zen, eta errepideak edo Oletabidea-k eta Barranco de Andua-k elkar gurutzatzen duten guneko pausua adierazten bide zuen. Egun ez da erabiltzen.
(...)