(...)
El Ferial eta Mutxarka-ren artean, ibaian bertan dagoen hersgunea da. Lehenengoz 1696an aurkitu dugun toponimo hau oreinen pausua izateari zor bide zaio (cf. Pasalobos eta Otsopasaje edo Otsopasaketa). Garai batean eskualde honetan orain erabat suntsitu diren animalia eta piztiak oso ezagun eta arruntak ziren. Hau da, adibidez, otsoaren kasua, bai eta oreinarena ere [Oltza zendean, esaterako, jatorriz orein eta ibia-z osatua zegoen Ororbia dugu, Iruñetik hurbil (ikus AV, 141. or.).], azken hau lehen hori baino gutxiagotan azaldu arren [Morionesko Oreingaña, Oreingibela eta Oreingibelgaña-n azaltzen dela dirudi. Ibargoitiko Izkon orein eta zuloa-z osatutako Oreinçuloa (PRA-Oibar, 25. k., 1648) dugu (cf. Otsazuloa Agezan), eta Itzagaondoko Idoaten Oreyn arbea (Artaizko eliz artxibategia, kontuak, 6. org., 1541): "Pieza en el camino que ban a Oreyn arbea". Erdaraz aztertzen ari garen Galipentzuko toponimoa eta Oibarko Valcervera ditugu behinola ugariak ziren animalien oroikarri bakarrak.]. Fustiñanan honen irudikoa den Salto de las Yeguas dugu.
(...)