(...)
Andigarra itxuren arabera Galipentzuko edo inguruko herriren bateko norbaiten ezizena zen (cf. Bastiligorra). Badina, esan bezala, ibaiaren mehargune bat edo uharka bat dela medio ura baltsatzen den alderdiari esaten zaio, eta ez bakarrik Galipentzun, Izaban [Estornés Lasa, DTR, 388. or. Honela definitzen du izen hau: "explanada de agua en un río o balsa en un cruce de caminos"], Tafallan [J. Jurío, THET, 50. or. Autore honek honela deskribatzen du Tafallako Las Badinas dermioa: "Depresión muy húmeda, con manantiales y juncales, cruzada por el «Barranco de las Badinas» que desagua en el Lavaco y, a pocos metros, en el Zidacos".] eta bestetan ere erabiltzen baita. Badina de Andigarra-n, informatzaileak dioskunez, Erronkaribarreko almadiek arazoak izaten zituzten, seguru asko beherago dagoen Murillo eta Zarrakazteluko uharkarengatik. Badina baino pixka bat gorago, portu moduko bat zegoen, gure osabarena den Uxueko "Corral del Cuadrado"-ren parean. Gorte honetan maiz ematen omen zuten gaua aipatu ibarreko almadiariek. Badina de Andigarra Llano de la Noria-ren parean dago, ibaian. Badina-n eremu lauari izena ematen dion "noria" dago.
(...)