(...)
[-Eta gure eskualdean. Uxue] Burni 'burdina', ziri 'cuña', 'clavija', 'makila' 'haga' izan litezke -eta-rekin batera ageri diren elementuak. Lehena 'burdina' dela segurua da, honekin batera burnia, burruna, burruña…eta beste azaltzen direlako. Ziri izena nahasiago dago, zubi eta zuri ere dokumentatzen direlako.
(...)

(...)
Egun ezezaguna den hau era batera baino gehiagotara dokumentatzen da. Aldaketak batez ere hasierako astra osagai ezezagunari eta kastillu 'gaztelu' -ren bukaerako bokalari dagozkio. Lehen elementuaren jatorrizko forma, maiztasuna hartzen badugu aintzat, itxura arrotzeko -tr- multzoa duen astra- dela dirudi (cf. Mostrakas Uxuen bertan, multzo beraz. Ikus sarrera hau). Bigarren osagaia Uxuekoa ere den Kastillu (Castillo gaur; Castillu edo Castillo dokumentazioan. Ikus sarrera hau) erdaratikako bera da. Santa María la Blanca-tik hurbil zegoen, La Sierra-n. Aurreko Burnizirieta dermioa "irentsi" bide zuen. Ez dakigu, halarik ere, Kastillu-ren baliakidea den ala ez. Izan ere, badakigu Santakarako bidea bertatik igarotzen zela, baina ez dakigu bide hau Pitillastik Kastillu eta Portillo de Chinchón-en barna Aragoa ugaldearen ertzeko errotara zihoana ote zen.
(...)

(...)
Oraingo honetan ere izen batua aukeratzea lan gaitza da, dagoen aldaera kopuru handi nabarrarengatik. Guk 1588ko lehen lekukoa hautatzea erabaki dugu, gardenena honek irudi duelako. 1605eko Burnizorreta eta 1634eko Burnierreta desitxuraketak dira, eta 1727ko Burruna zubieta herri etimologiaz sortu dela dirudi, 1724eko Burniazurieta (cf. gainera 1746ko Burnizurrieta) bezala, eta honetatik edo honen pareko batetik abiatuta [Egun ezezaguna den Erripazarreta izenaren bigarren osagaiak ere antzeko aldakiak aurkezten ditu. Erripacarreta 1601ean, Ripacurieta 1685ean, Ripa zubieta 1708an. Ikus sarrera hau.], antza. 1629ko Brunicarieta edo 1704eko Burniçarieta, 1631ko Burnicerieta, eta 1688ko Burnicieta jatorrizko 1588ko Burniçirieta-ren itxuratxartze arin samarrak dirateke. Osagaiak burni 'burdina', ziri 'cuña', 'clavija', 'haga' eta -eta izan litezke, baina hau ez da inola ere segurua. Izan ere, bigarren elementua toponimian hain ezaguna den zuri, edo honekin aldizkatu ohi diren zubi eta zahar (-zurieta / -zubieta / -zarreta segidan. Ikus Erripazarreta sarrera) izan zitekeen. Azpimarratzekoak dira hemen 'burdina' adiera duen izenaren aldaerak. burni- da gehienetan, baina 1724ean burnia- dugu, eta 1727an burruna. Cf. Zaraitzuko burña, burruña Erronkarin, Mitxelenaren arabera [FHV, 162. or.]. Autore honek dioenez u-i > u-u asimilazioa jasan duen burdun-, burrun- elkarketako aldaera ekialdeko euskalkietatik kanpo ere aski hedatua dago [Id., 80. or.]. Burnizirieta La Sierra-n zegoen. Badirudi Astrakastillu-k ordezkatu zuela, 1746ko lekukoa aintzat hartu behar badugu behinik behin. Hortaz, Astrakastillu bezala (ikus sarrera hau) Santakarako bidearen ondoan zegokeen, Santa María la Blanca-tik ez urruti.
(...)