(...)
Primicia, Iribarrenek dioenez [VN.], elizari emandako hamarrenak gordetzen ziren etxeari esaten zaio Nafarroan, eta Galipentzuko dekuma-ren adierakidea da (ikus herri honetako Dekumazarra) [Bi izenon adiera, Iribarrenek dioena gorabehera, ez da bera. Primiziak apezentzat ziren, eta fruitu nahiz animalienak izan zitezkeen. Hamarrenak berriz eliza (eta Eliza)-rentzat ziren, eta konponketa, berrikuntza...eta bestelako beharrak asetzeko erabiltzen ziren.]. Carrera ere erdaratiko hitza da [Latin bulgarreko *carraria-ren eratorria, hau, bere aldetik, carrus 'gurdia'-tik heldu delarik. Carrera-tik, laburketaz, Nafarroako Erriberan eta Aragoan ezaguna den carra atera bide da.]. Tafallan, J. Juríok dioskunez [THET, 22-24. orr.], edozein bideri deitzen zitzaion "carrera"; Uxuen 'karrika' adieraz erabilia aurkitu dugu [Carrera del Halda, Carrera de la Bizkarra.], eta Oibar haranean, Oibar herrian ez bada [La Carrera del Molinaz (IEA, 1765. kart., 9, 901. or., 1723), La Carrera del Saso (PRA-Oibar, 15. k., 1596)...], oso gutxitan azaltzen delako inpresioa dugu. Nolanahi ere, eta bi osagaiak erdaratikakoak diren arren, euskal elkarketaren ordenari jarraikitzen zaionez itzulika euskalduna dela esan daiteke, "espejismo" huts baten aitzinean ez bagaude bederen, behin bakarrik aurkitu dugulako.
(...)