(...)
Aurrekoa bezala aldi bakar batez aurkitu dugu, eta beraz etimologia zein zen zuzen esatea ez da lan erraza. Itxuraz latineko planu 'llano'-ren gure alderdiko ondorengoa den Plau 'lau', 'zelai' eta ondoa dira bi osagaiak. Hasierako pl-ren mantentzea ez da ohizkoa euskaraz (cf. planu > lau, placet > laket, planca > langa...), eta alderdi honetan hasierako ezpainbiko ahoskabea desagertzen ez bada, nafarreraren eraginarengatik izan daiteke, hizkera honetan, gaztelaniaz agitzen denaz bestalde, ez baita sabaikaltzen: Plandeoliva (Galipentzu), La Plana [Id., 11. k., 1603.], Las Planas [PRA-Kaseda, 42. k., 1813.], El Planaz [Id., 1. k., 1681.], El Plano [Id., 4. k., 1687.] (Kaseda), La Plana, El Planillo (Oibar), La Plana [PRA-Oibar, 3. k.-bis, 1587.], El Plano [PRA-San Martin, 43. k., 1755.] (San Martin), Pla(n)menor, La Plana, El Plano romeral (Zarrakaztelu [R. Ciérbide, TCO-II, 63-64. orr. Honela mintzo zaigu autore hau: "Frente a la solución castellana de palatalización del grupo inicial latino PL > /ùl/ es característica del navarro-aragonés la conservación del mismo. En este aspecto, la toponimia de esta comarca se ha mantenido fiel al dialecto, pues sólo en un caso se registra la solución castellana".]). Dena den, goragokoa zen Lizarraga Elkanokoak plau darabil, erdarazko 'llano' adieraz: "Doctrina Christioarén Cathechima euscarás: Credoarén, Mandaméntuen, eta Sacraméntuèn erabaquiera plau, sencill, claro, euscaldún-erri chipietán provechadezaquéna, laguntzecó Apez-Aitéi eracústen beren menecoéi labúrqui ta erráz" [DCC-ko sarrera.] Eta Axularrek plaundu [Gero, Bordele, 1643, 30. or.]: "Içan çutenean Erroma-tarrec, desiratcen çuten abantailla eta garaitia, Cartago tarren gaiñean, Sarthu ciren conseilluan Erromatarrac, ea cer eguinen çuten, Cartagoco hiri hartçaz. Eta Catonec (principalenetaric bat baitcen) erran çuen, guztiac deseguin, plaundu eta lurrarequin berdindu behar çuela..." Eslabako hau ez da gure alderdian dugun bakarra: Plau daukagu Zaren, euskaraz ohizkoa den bokal arteko hortz-hobietako sudurkariaren erortzeaz, eta Pelau (Pelaubidea, Pelaumuga) Leatxen, bokal anaptitiko batez hornitua. Herrian bertan zegoen dermio gaur desagertu hau, apika egungo El Llano-ren ondoan (ikus, dena den, Eode eta honen eratorriak aztertzean esan dena).
(...)