(...)
Calvo deitura (ikus Agezako Calvo sarrera) zuen norbaiten gortearen sarrera ingurua adieraz zezakeen Lezkadui (El Lezcal orain) barruan edo ondoan zegoen honek. Korral(e) gure eskualdean behin baino gehiagotan aurkitu dugu (adibidez, Leatxeko Auntzenkorraleta edo Uxueko Korralandia izenetan), agertzen ere den gorte edo korte-rekin batera eta balio beraz. Sarraldea erdal entrada arruntaren ordaina izan daiteke, baina hau dugun lekuko bakarra denez, baliteke s- dokumentazioan hainbestetan ageri den z / s nahasketaren beste adibide bat besterik ez izatea, eta orduan sarraldea 'sarrera' gabe, zarraldea (alegia, zahar aldea, 'korrale zaharraren ingurua' edo) genuke. Gainera, erdarazko entrada-ren ordaintzat sartzea edo sarrera edireten dugu han-hemenka, ez sarraldea: Ibero herrian adibidez, Oreya toponimoa dugu, eta honekin batera Entrada de Oreya eta Oreya sarçea [J. Jurío, TCPCO, 142. or.]. Aezkoako mendietan osagai bera duen Sariozarsartzea toponimoa dugu bizirik oraindik, eta Burundan sarrera erabili izan da, azken bi mendeotan erdarazko entrada franko sartu bada ere: Epeltxikiko sarreria edo Epeltxikiko entrada, Oporoko entrada edo Oporoko sarreria (Bakaiku).
(...)