(...)
Gristio Joakin Lizarraga Elkanokoaren liburu baten tituluan [DCC.] errepikaturik aurkitzen dugun christioa 'kristaua'-ren kidea izan daiteke, euskaraz arrunta den moduan hasierako herskaria ahostundu delarik (cf. Axularren giristino) [Kristioa edo Gristioa lortzeko, *Kristiano, *Gristiano-tik abiatu behar genuke; hemendik bokalarteko sudurkariaren galeraz *kristiao edo *gristiao aterako zen (cf. *ardano > ardao), eta forma hauetatik, toki-izenetan behintzat ongi dokumentatua dagoen ao > o laburketaren ondorioz, kristio eta gristio (cf. ardao > ardo, edo Cipriano > Zipirio). Ikus honetaz FHV, 150-153. orr.]. Jakina denez, gaurregun kristau 'pertsona' adieraz ere ibiltzen dugu, lagunarteko hizkeran, eta daitekeena da Eslabako Gristioburua hau Leatxeko Gizaiduri edo Arakilgo Gizairudiaga (Izurdiaga egun [Ikus NHI, 78-79. orr.]) toponimoen parekoa izatea (cf., dena den, Eslabako bereko Gristiodiaburua izena).
(...)