(...)
Otabera [òtabéra] izena alderdi honetan zegoen otabera ugariari zor zaioke (cf. Ezporogiko El Otaberal), baina gaurregun gure informatzailearen arabera bertan ez dago horrelako landarerik [Berdin gertatzen da, adibidez, Zareko El Chaparral-ekin. Honek ez du esan nahi toponimoa sortu zenean horrelakorik ez zegoenik.]. Otabera ote-ren eratorria da, eta beraz hemen ere balio multzokaria duela garbi dago (ikus Eslabako El Chaparro sarreran dioguna [Mezkiritzen Otaraz dugu orain, Otabera(t)z XVIII eta XIX. mendeetan, dudarik gabe aurreko *Otaberatze batetik. Orreaga Ibarra, MT, 345. or.]). Iribarrenek honela deskribatzen du landare hau [VN.]: "Planta espinosa, distinta de la aliaga, que utilizan para encender el horno" Azkuek [DVEF.] otar eta oteme biltzen ditu bere hiztegi ezagunean. Honela diosku: "argoma dura, lit.: argoma macho, á diferencia de oteme, argoma blanda, lit.: argoma hembra" Nafarroako Otabera oteme bera izan liteke, hots, ote bera edo "argoma blanca" (cf. gaztanbera). Ageza, Eslaba, Ezporogi, Leatxe eta Zaren izen arrunta da. Otabera Llano de Idozabal, Ugarka eta Sandiandore-ren artean dagoen aldapa handia dugu. Goiko aldeari Cantera de Otabera esaten zaio orain, Alto de Otabera dokumentazioan. Otabera-k Idozabal, Itxudur, Ugarka eta Sandiandore-rekin mugatzen du. Entrepeñas ere aztergai dugun honen mugakidea bide da, baina dermio horren kokagunea ez dago xoil garbi, gorago esan moduan.
(...)