EODA osoa

(...)
Toponimo honetan harea 'hondarra' eta mendikoa 'mendi txikia' osagaiak ditugu [Ikus Iguraimendikoa sarreran dioguna.]. Bigarren lekukoa (Aremendicoa, 1594)-k are- duen arren, lehenak area- dauka, eta gainerakoak ere honen alde mintzo zaizkigu. Lergako bertako eta inguruko herrietako Areatzea (Eslaba) eta Areatzeta (Uxue)-k ere uste hori baieztatzen dute. Bukaerako -ko hori, leku-genitiboa gabe, zenbait hitz (mutiko, neskatiko...) eta toponimotan (Arizkomendia, Iguraimendikoa, Munikotxorrotx...) azaltzen den atzizki txikigarria dugula zalantzarik ez dago. Reta Janárizek [EHZE, 492. or.] guk aurkitu ez ditugun Aramendicoz eta Arramendicoa aipatzen ditu, eta hauetan oinarrituta etimologia okerra egiten du. Honela mintzo da autore hau: "Aramendicoz (var. «Arramendicoa»). De «aran» «valle», «mendiko» «montículo» (de «mendi» «monte» y suf. diminutivo «-ko»), y «otz» «frío», es decir, «montículo frío del valle». La variante «Aramendicoa» significa «el montículo del Valle»" Egun Aramendikoa [aràmendíkwa] [Gure informatzaileak (Juan Iriarte jaunak) Aramendikoa [àramedikóa] ere eman zigun, baina Rotabidea [ròtabidéa], Rotabidia [ròtabídja], eta San Ginesondoa / Sanginesandoba bezalako pareak ere eman zizkigunez, ez dakigu zein neurritan diren herrikoiak izen euskaldunetik hurbilen dauden aldaera horiek. Berak esan zigunez, aitarengandik ikasiak zituen.] deitu ohi dena Lizarduia, Biguri eta Aldemuga-ren arteko gaintto bat da. Carasol de Areamendikoa mendiko honen eguzkialdea izango zen.
(...)