Leku-izenak

(...)
Corominasek azud 'uharka' biltzen du [DCELC.] eta Iribarrenek azut, esanahi beraz [VN.]. Guk El Azutte (Kaseda [PRA-Oibar, 71. k., 1778: "... en el terno de Caseda Juntto al azutte... para hazer viña a Ondalan".], Zare), El Azute (Galipentzu), Asut edo El Azute (Zare), eta Lazud (Kaseda [PRA-Kaseda, 58. k., 1849: "una pieza... en el termino de la villa de Caseda llamado Lazud afronta a... camino de Pamplona".]) aldaerak ediren ditugu, beti hiru herrion arteko mugaldean. Antza duenez, El Azute beste batzuetako El Arcal (Kasedako mugakoa, ez gaurkoa)-en baliakidea da, gorago esan bezala bertan uharka (arcal bat alegia) baitzegoen, hiru herriotako mugan, seguru asko uraz Kasedakoak baliatzen zirelarik. Egun ere El Azute esaten zaio alderdi honi, eta Errengaitz, El Cerrado eta Muga de Gallipienzo ditu mugakide, Galipentzuko El Azute ezezik. Errekak Ordokia-tik bereizten du.
(...)

(...)
Iribarrenen arabera [VN.] azut as-ssudd izenak 'uharka' adiera dauka Zintruenigon. Corominasek azud 'ugaldeetatik ura hartzeko uharka' biltzen du [DCELC.], eta arabierako sudd 'oztopoa', 'traba', 'uharka'-tik eratortzen [J. Gárrizek dioenez (Despoblados, 13. or.), Azut Erdi Aroan hustu zen mauruek Ebro ugaldearen ibarrean sortutako herrixketako bat ere bazen.]. Esperatzekoa zenez, El Azute Zareko lurretatik datorren eta Kaseda eta Galipentzuren arteko muga markatzen duen errekaren ondoan dago. Lehen herri horretako El Azute-rekin eta bigarreneko lurrekin mugatzen du iparraldetik eta ekialdetik, Errekagaitza-rekin mendebaldetik, eta La Recueja-rekin hegoaldetik. Aspaldian Oibarra zihoan bidea (edo bide bat behintzat) bertatik igarotzen zen.
(...)