Leku-izenak

(...)
1915eko katastroan Recueja aldaera azaltzen da baina gaur forma bakarra La Recuaja [rekwáxa] da, guk dakigula. Aragoaren bihurgune batean dago, El Azute, Errekagaitza eta Santitisi-ren artean. Kasedan La Recueja [PRA-Oibar, 63. k., 1770: "en el mismo mojon debisorio del therno de la Recueja de las villas de Gallipienzo y Caseda".] edo La Requexa ediren dugu [Id., 41. k., 1729.] eta Esa herrian ere bada izen bereko dermioa, hemen bezala Aragoa ugaldearen ertzean. Hortaz, badirudi toponimoa ubidearekin lotu beharra dagoela [Galipentzuko La Recueja ugaldearen bihurgune edo "recodo" batean dago]. Korellan Ampol-Recueja [1891ko katastroa.], Recueja de Ampol [1834, Korellako hipotekak, 2. lib..] edo Recojal de Ampol [Id.] azaltzen dira, eta hauekin batera Recueja [1891ko katastroa.], Recojal [1829, Korellako hipotekak, 1. lib.] eta Recueja de Burcemay [1834, Id., 2. lib.], baina ez dakigu denak erreka ondoan zeuden ala ez, baietz irudi duen arren. Erriberako herriko egungo Recueja Alhama ugaldearen bihurgune batean dago, bihurgune hori Kaseda eta Galipentzun Aragoak egiten duena bezain itxia ez delarik. Tafallan ere La Recueja biltzen du Jimeno Jurío jaunak: "Llano sobre la margen izquierda del Zidacos, frontero al Quiñón, desde Larrain (N) hasta el meandro del río al llegar a San Gregorio y Gerón, espacio denominado «Rincón de la Recueja" [THET, 172. or. Azpimarra gurea da.] Hortaz, badirudi Recueja-k aski zabalduak daudela Nafarroan, eta beti ugaldeetako bihurguneetan egoten direla, honetaz erabat ziur egoteko beste Recueja gehiagoren kokalekuaren berri izan behar bagenu ere. Jatorriari dagokionez, gaztelaniako cojo-rekin loturik egon daiteke (< coxu. Cf. Euskarazko oker-en adierak: betoker 'tuerto', hankoker...), eta sorburu gisa *rivacoxa (cf. Uxueko Retuerta) proposa daiteke. García Larraguetak ere Recueissa eta Recueissa de Cahues biltzen ditu, biak Vergalijo ondoko Cahues despoblatuan [El Gran Priorado, 208. eta 209. agiriak.], eta Lacarrak Recuyssa aurkitu du Milagron XIII. Mendean [OV.].
(...)