Leku-izenak

(...)
Ibón Aragoako Pirinioetako toponimian hain ezaguna den izen bera da, alegia, elurraren urtzeak eragindako iturburu eta errekek sortzen duten aintzira [J. Borao, Diccionario de voces aragonesas, Reta Janárizek aipatua, EHZE, 488. or. Ikus, orobat, Ibarra sarreran esan duguna.]. Galipentzuko Ibón [ibón], dena dela, Aragoa ugaldean bukatzen den Engubelea eta La Sierra-ren arteko errekasto baten izena da jatorriz, ez aintzira batena, eta gero hedaduraz ondoko lurrak izendatzera ere igaro da. Izaba herrian Ibón izeneko harpea dugu [B. Estornés, DTR, 384. or.]. Paco de Ibón errekaren ondoko oihezkia da, eta Camino de la Sierra-tik Aragoa ugalderaino luzatzen da. Diogun bukatzeko toki-izen hau, irudiz zaharra bada ere, ez dugula dokumentazioan sekulan aurkitu.
(...)

(...)
Reta Janárizek El Hoyo Jandúa aipatzen badu ere, gaurregungo forma Janduba [xandúba] da, -b- eta guzti [Janduba Galipentzuko deitura edo izengoitia da orain, eta Eslabako etxe baten izena ere bai. Azken herri honetan lehen Jandua zena Janduba da orain, Galipentzun bezalaxe. Ikus Eslabako Alto de Jandua sarreran dioguna]. El Hoyo de Janduba Barranco de Ibón-ek egindako zulo luzea da, eta Portillo de Jares-etik Camino de la Sierra-raino luzatzen da. Paco de Janduba berriz zuloko elutsa dugu, alegia, Camino de la Sierra-tik beheiti Paco de Ibón deritzan iparragerri bera.
(...)