Leku-izenak

(...)
Beltran pertsona izena eta larratz 'lehen bai baina orain lantzen ez den lurtsaila' [Zaren larratza-k herri ondoan zeuden, larrainen ondoan. "una huertta...teniente a las eras o larrazas que llaman de Yrigoien"(1730). Ikus herri honetako Iribarren sarrera. B. Estornés Lasak Izabako izen arruntetako jotzen du larraza, eta 'terreno baldío' adiera ematen dio (DTR, 388. or.).] ditugu toponimo honetan. Gure egunotan Mentangarraz [mèntangarráz] edo Monta[n]garraz [mòntangarráz] esan ohi da, 1688an zeharo argia den izenaren itxuragaiztotzearen ondorioz. Gaurregun Capaburros-etik Galipentzuko muga aldera luzatzen den Aristuziaga-ko gain bat izendatzen du. Gain izateari zor zaio, ezbairik gabe, 1688ko Beltran larraza alto aldaerako izenondoa. 1778rako Beltranlarraz(a) Beltrangarraza bilakatua zen; 1801eko lekukoaren arabera Beltranlarratz Zubialdaia zen antzina, baina gure iritziz zera gertatu zen, alegia, Galipentzukoa zen Zubialdaia galdu zen bitartean Uxueko Beltranlarratz gorde egin zela. XIX. mendeko lehen urtean mugarriak berraztertu zituztenek aurreko agiriak ikusita nahastu, eta izen ordezkapena burutua zela pentsatuko zuten. Izan ere, 1668an garbi ageri da Zubialdaia-k hogeita hiru eta hogeita laugarren mugarriak hartzen zituela, eta Beltranlarratz-ek aldiz hogeita bostgarrena. Carasol edo Solano de Beltranlarratz Vicente Juríoren gortearen azpiko aldeko zokoko iguxkunetxoa izan zitekeen, itxuren arabera. Nolanahi ere den, 1688ko Galipentzu eta Uxueren arteko mugen berrikusketako datuak ez datoz bat oraingo mugekin, eta hau dela eta Beltranlarratz hegoalderago, Portillo de Chinchón alderago luzatzen zelako susmoa dugu.
(...)