(...)
Ez dakigu zein den orain Ikarra [ikárra] bilakatu den toponimo honen jatorria, ez eta euskarazko elkar-ekin zerikusirik baduen ere. Dena den, ez dugu dudarik egiten Galipentzuko izena Garaioako Ekarrea [èkarréa] bera dela, bukaera gorabehera (cf. Arana / Aranea, Zabala / Zabalea... eta beste). Aezkoako herriko toponimoaren aurren lekukotasuna 1781eko Elcarrea dugu [PRA-Auritz, 49. k.], eta hau dela eta elkar-ekin loturik egon daitekeela kontu egin daiteke, 'fazeria' zentzuan apika [Azkuek Elkarkiko 'facería' biltzen du hiztegiaren eranskinean.], baina 1783rako [PRA-Auritz, 51. k.] Ecarrea azaltzen da aipatu herrian [Orotz-Betelun Ecarre(a) etxea dugu (B. Urtasun, TOB, 335. or.), eta Ihabarren Ycarrea toponimoa dokumentatzen da 1565ean (PRA-Arakil-Hiriberri, 2. k.).]. Galipentzuko Ekarra ez dago beste herri bateko mugan [Fazeriak bi edo herri gehiagoren arteko mugan egoten direla gauza jakina da, baina behin edo beste barnekaldean ere aurkitzen ditugu (ikus Uxueko Abuñaga sarrera).], eta ez dugu sekulan *Elkarr(e)a-ren modukorik edireten. Lehen lekukoa 1591koa da (ikus Camino de Melenas sarrera), eta geroztik eten gabe agertzen da dokumentazioan (ikus Camino viejo de Melenas). Egungo Carasol de Ekarra 1616ko Solana de Ekarra da. Oraingo Cantón de Ekarra Alto de Ekarra edo Cantera de Ekarra da agirietan eta Paco de Ekarra Caracierzo de Ekarra.1816ko Costado de Ekarra Santa Elena aldea izan liteke, baina costalado eta saihetsa-ren gure alderdiko 'aldapa' balioa ikusita, hemen ere adiera hori duela uste dugu. Kasu honetan Paco de Ekarra-ren esanahikidea litzateke. Ekarra-k Tximarra, Melenas, Garandako harana, Ibarreko harana eta Santa Elena-rekin mugatzen du.
(...)